
រដ្ឋបាលខេត្តពោធិ៍សាត់ ណែនាំផ្អាកការបង្កបង្កើនផលដំណាំស្រូវនៅរដូវប្រាំងលើកទី២ ដើម្បីជៀសវាងការខ្វះទឹកសម្រាប់ប្រើប្រាស់
ពោធិ៍សាត់៖ រដ្ឋបាលខេត្តពោធិ៍សាត់ ណែនាំប្រជាកសិករ ផ្អាកការបង្កបង្កើនផលដំណាំស្រូវនៅរដូវប្រាំងលើកទី២ ដើម្បីជៀសវាងការខ្វះខាតទឹកសម្រាប់ប្រើប្រាស់ប្រចាំថ្ងៃ និងសម្រាប់សត្វពាហនៈ និងធ្វើឱ្យខាតបង់ថវិការបស់ប្រជាកសិករ។
មន្ទីរធនធានទឹក និងឧតុនិយមខេត្តពោធិ៍សាត់ បានបញ្ជាក់ឱ្យដឹងថា នៅរដូវប្រាំងឆ្នាំនេះ ការផ្គត់ផ្គង់ទឹកជូនប្រជាកសិករក្នុងខេត្តឆ្នាំនេះបានត្រឹមតែ២០ម៉ឺនហិកតា ប៉ុន្តែជាក់ស្តែងការបង្កបង្កើនផលរបស់ប្រជាកសិករបានកើនរហូតដល់ជាង៤៦ម៉ឺនហិកតា ដែលលើសពីផែនការប្រើប្រាស់ទឹកដល់ទៅជាង២៦ម៉ឺនហិកតា។
រដ្ឋបាលខេត្តណែនាំប្រជាកសិករ បន្ទាប់ពីប្រមូលផលរួចរាល់នៅក្នុងអំឡុងខែមករា ដល់ខែឧសភា ឆ្នាំ២០២៤ ត្រូវផ្អាកការបង្កបង្កើនផលដំណាំស្រូវជាលើកទី២។ ជាមួយគ្នានេះ ត្រូវត្រៀមលក្ខណៈស្តុកទឹកក្នុងស្រះ អណ្តូង ប្រឡាយ ដែល អាចស្ដុកទឹកបាន សម្រាប់ទុកប្រើប្រាស់ប្រចាំថ្ងៃ និងសត្វពាហនៈជាដើម។
រដ្ឋបាលខេត្តបានបញ្ជាក់ថា ក្នុងករណីប្រជាកសិករនៅតែអនុវត្ត មិនទទួលយកការណែនាំរបស់រដ្ឋបាលខេត្តទេនោះ រដ្ឋបាលខេត្តមិនទទួលខុសត្រូវលើការខ្វះទឹកស្រោចស្រពដំណាំស្រូវនៅរដូវប្រាំងនេះឡើយ។
ប្រជាកសិករប្រសិននៅតែបន្តបង្កបង្កើនផលស្រូវរដូវប្រាំងលើកទី២ ទៀតនោះនឹងអាចជួបប្រទះការខ្វះទឹកប្រើប្រាស់ប្រចាំថ្ងៃ ខ្វះទឹកសម្រាប់សត្វពាហនៈ ហើយថែមទាំងខាតបង់ថវិកាផងដែរ៕